اورین داغیینا بنزر
"آدام وارکی نفس چکیر اولودی
آدام وارکی اولوب آما دیریدیر "
اَورین کیمین اوجا بویلی ...
گئنیش اوره ک ...
سینه سیندن مهربانلیق گوز یاشیندان آیدین اولان سولار کیمی
کسیلمه دن آشیب داشان
آناسینین قوجاقیندا آشار داشارلابویلاشان
اوز تای توشی چیچکلرله
دورنا گوزلی بولاقلارین صاف سویی تک
سوزولوردی توز بوروموش کوچه لرده
قارتال کیمین خیاللارین قانادیندا
گوی دوشونه اوجالیردی ... یاشیییردی ... بویویوردی...
سوزلری داغلارسوزویدی
اوزی اصلانین اوزیدی
گوزلری منجیق ایشیقلی
گونش کیمی پاریلداردی
گله جگی جنت کیمین
- اوتوپیا دییرسیز سیز-
کتابلاردا ، درگیلرده، شیرین شیرین صحبتلرده آختاراردی
دئمه گینن هم اوزونی
همده بیزی
آللادیردی یازیق بالام...
هیکل کیمی یونولموشدی غرور داشیندان دییه سن
آغزیندا ازبر سوزویدی:
کاشکا اولا حاجی بیگین چمنیندن
آرخالیق تیکیب گییه سن
چیلله خانا
قلی دره
صفر داغین دوشلرینده اوتاریلمیش قویونلارین
سوت قاتیقیندان ییه سن
...
گاه گلیری ایندی هرده ن گوز اونومده ن
پری کیمین سوزوب کئچیر
شافاق کیمین داغ دالیندان نور سیچراییر
سو چیچگی کیمین سویون ، بئشیگینده ییرقالانیر
گویده اوچان درنالارلا قاناد چالیر
قاناد چالیر... قاناد چالیر...
گوزده ن ایتیر خیالیمدا
ایندی هرده ن دولو جامین جامیمیزا ویریر ایچیر
دولدور دییر ؛
بوش قالماسین جامین گه ره ک
دوستوم سایما جاملاریمی
من نه قدر ایچرسه م ده
چوخ دالییام سنده ن هه له...
اونچی داییما ایچه نده
عشق اولسون سنه دییره م
آیدینجا دوداقیندان آخان
قدح سئوداسین گوروره م
سنسیز ایندی هر یئر قورو
ایندی چمن لر یئرینه
یاشیل آرخالیق یوخ گولوم،
حسرت لباسین گییره م
ایندی اینان سنسیز یایین چیلله سینده ده اوشوره م
ایندی هر شیققیلتی گلنده
داشلانیرام
دیسکینیره م
باشسیز بوجاقسیز دریادا، تک باشیما اوزه ممیره م
تانیش گلمیر بورا منه
دالغالاری باشدان آشیر
اوجا قالخیر
افقلری گوره ممیره م
فیرتینا قالخیب سمایه
یه نه جک می؟ یه نمیه جک ؟ بیله ممیره م
عصیان چکیلیب هوایه
دورد بیر یاندان یاغیر بلا یاغیشلاری
یازیق باغلار بو خزانه
دوزه جک می؟ دوز میه جک ؟ بیله ممیره م
ایتیرمیشم هوش باشیمی
هئچ بیلمیره م هارالیام
یئرده قالان سازین کیمی
سوسولموشام
تئل تئل کوکده ن قیریلمیشام
دیدیک دیدیک دیدیلمیشم
یارالیام
ایندی هرده ن نفس گلمیر
یورغون ایاقدان دوشوره م
دیزه چوکمک ده ن قورخورام
باشارمیرام
نه اولارکی اوزاد الین
توت الیمده ن منی آپار
چک اوستومی باسدیر منی
آل یانینا منی قوتار...