اوخشاما
دورورام گاه سویون اوزونده
سو سینیر دوشوره م سویا
گولوش سسی آخشاملاریمی دولدورور...
دییه سن
آنلادیغیمیز دیل تکجه اوخشاماقدی
چای استیکانیندان قاوزانان بخار،
و اوتاقیمیزی دولدوران سیگارت توستوسی ،
و یاتاغیمیزدا یاناغینا دوشن گؤزلریمین پارلاقی کیمی!
....
بئله دویغولارینان مشغولام ایندی لر
و بیر قاپی خیالیمین اوزونه باغلانیرسا باشقا بیری آچیلیر.
نه اولار
[ بوتون عومروموز سئودیگیمیز قادین
- حیات یولداشلاریمیزی یوخ-
آنالاریمیزی دئییره م ]
شهریمیزی مقدس ائوسیزلر کیمی دولدورماسین
چونکی
تکجه وطنی سئوه نلر آنالاری سئوه بیلرلر
- بو سوزون ترسه سیده دوزدو-
دیواردا اوینایان گؤی رنگلر، اودوندو
و گؤیده ن دوشه ن توپ، اولدوز ده نه سیدی.
حقیقت کپیر باغلاییب
قان کیمی
شهرلر کیمی
تؤز بوروموش یوللارا دوشن گون ایشیقی کیمی
حاصیل سیز قابارلی اللر کیمی
سیله بیلمه سه کده او اوردادی
توستی و اود آراسیندا...