سندن سونرا
سندن سونرا
هر نه اولاجاق اولسون
وئجیمه ده ییل کی ...
قوی بو وجدانسیز بایقوش گئجه یاریسی
اؤلکه ده کی لوت آغاجین قوروموش چیینینده
با نناسین
قار دورمادان ائله چیله سین کی
یاز یولون ایتیرسین؛
و ائلیمیزین قانی قاچمیش کوچه لریندن گئچمسین...
هر نه اولاجاق قوی اولسون
نه بیلیم
بلکه ده هر شیء قورتولوب
هرشیء.
نه بیر آن عشق دفترینه قول چکن ایکی دوداق
نه بیر باشی اوستونه قویوب
شئهلی ناریندان
دن دن یئمه یه
قوجاق!
نه بیر ماهنی
اتینن دری آراسیندا ائله توی توتا
اولدوزلاردان لاری چیخانا جان پیله کلرین شاباش وئره لر
و گون
نازلانا نازلانا
خالقین کوره کلری آرخاسیندان قؤوزانا!
و پلیس لر
دونن کی پست لاریندان
چال اویناسیندان باشقا بیر شیء یادلارینا گلمییه
و بیر کس تاپیلمیا
اوچ یوز آتمیش بئش گوندن سونرا
آوجیندا حتتا یئلده اولمایا...
نه دئییم
بلکه ده
هر شیء قورتولوب.
قوی بایقوش نه قدر بانلییر بانلاسین
بو قیچی کوشوموش آغاجین چیگنینده
و دیوارین هره سینه
یاسمن باش قویوب فوتویا دؤنمسین گؤزلریمده...
گورموسن مگر
بو ساققیز کیمین اوزانمیش قیش
آند ایچیب
ائلیمیزی ، دیلیمیزی و کیملیگیمیزی دؤندارماسا
ال چکمیه جک
و شریتده
گوللی زوبون ایله جان کؤینه یین قویمویاجاق
ایستی گون آلتیندا
یئلین شوخلوق باز الینده
اویناسینلار
و نملی جانلارین
بیربیرینه سورتوب
ائله دویوننسین کی
قاضی نین قامچی ویران،
داشا باسان الی
آییرا بیلمسین
و اتکلری یئره ده گه نده
قؤری، قوری کایناتین تایاسینا یاخیلسین...
نه بیلیم
بلکی ده بیر گون گلر
آغاجلار چیمدیگینن پاتلایار
مزیلتیلار ماهنیا دؤنر
و باشی توفانلی ائلیمده
سونامی قاققا چکر...