كئفلي كيشيله آييق جنّين دانيشماسي
لاخماتُف، سيلاحلي قووه لرين گئچميش ايشچي سي و دولتين امكلي كاتيبي، ائوينده كي ماسانين داليندا اوتوروب، اون آلتينجي قدهي بوشالداراق، قارداشليق، بيرليك و آزادليقي دوشونوردي كي بيرده ن بيره لامپانين داليندان بير جين باشين قالديريب، باخيشين اونا تيكدي... اوخوجو بايانلاردان رجا ائده ره م قورخماسينلار... داها دوغروسو بيليرسينيز جين نه دير؟ جين ياكيشيكلي بير گنج، چكمه كيمي قارا اوزلي و قيرميزي ايري گؤزلي بيريسي دير. باشيندا دا ـ دئمه لي ائولنمه مه گينه ره غمن ـ بوينوزي وار. زولفلرينين زينه تي كاپول(1) سبكينده دير. اَنداميني گؤي يون اؤرتوب و بئلينين آلتيندا قويروق ساللانيب كي قورتولاني بو شكيلده دير...اَل يئرينه پنجه سي وار و آياق يئرينه ديرناق. لاخماتف جنّيني گوره ن كيمي بيرآز قورخدو. آنجاق، گوي جينلرين كئفلي لر سوراغينا گئتمه عاده تلري، يادينا دوشه نده ن سونرا، تئز اؤزونه گلدي. چاغيريلماميش قوناغا اوزون توتوب دئدي: پاردون، عالي جنابلاري كيم اولا؟
جين اوتاناراق گوزلرين يئره تيكدي.
لاخماتف دوام ائتدي: اوتانمايين لوتفن، ايره لي گلين ... من خرافاتي بيريسي ده گيلم. ائله بونا گوره منيلن راحات اولا بيليرسينيز... اوره گينيزين سؤزون سؤيله يين... سيز كيم سينيز؟ جين تيتيريه ره ك لاخماتفا ساري گئتدي. قويروقون قيشلاري آراسيندا گيزله ديب، سايقي گوسترمه ده ن سونرا اؤزونو تقديم ائتدي: من جينّ ام.
ـ بلي. بلي. ائشيدديم... چوخ بخته وه ره م. بويورون اوتورون! ايچكي ايچرميسينيز؟
چوخ بخته وه ره م... ياخشي، ايشينيز نه دير؟
جين به رك اوتاندي...
اوتانجاقدان اؤسگوره ره ك، بورنونون سويون »ربوس« نان سيله ره ك دئدي: »داها دوغروسون ايسته سز، بللي ايشيم يوخدور. گئچميشده البته ايشيم گوجوم واريدي... اينسانلاري آزديريرديم دوز يولدان جاشديريرديم اَيري يولا چكيرديم ... آنجاق اؤز آراميزدا قالسين ، ايندي حيله لريم هئچ كيمسه نين ايشينه گلمز... دوغرو درست يول قالماييب كي بيري اوندان آزسين... اينسانلار بيزده ن ده چه ويك و زيره ك اولوبلار... اؤزونوز يارقيلايين (حوكوم وئرين) اولا بيلير يونيورسيته ده بوتون بيليم لري اويره نن و اوددان سودان گئچميش بيري سين آللاتماق! آخي نئجه بيرينه بير روبل اوغورلاماقي اؤيره ده بيلله م، بير حالدا كي اؤزي ياشايشيندا، مين لر روبلي جيبه ووروب؟
ـ بويوردوقلارين لاپ دروست... آما هر حالدا بير ايشين اولماليدي...
ـ بلي! اونجه كي ايشلرده ن تكجه قوري آد قاليب بيزلره. آما هر حالدا ايشسيزده دگيليك. قيز مدرسه سي مودورلرين يولدان ائله ييريق... جوانلاري شعير دئمه يه راغيب ائله ييريق...
و كئفلي تاجرلري قدهي سينديرماقا تشويق ائله يه ريق... داها چوخداندي كي پوليتيكايا، ادبياتا و سايير علوما باش اوزادميريق... بؤيله بير شئي لري داها آنلاميريق. اينانا بيلمزسن كي بيزلرده ن بير نئچه سي جين اولماقي ترك ائديب، اينسان اولوبلار... ايشلريده به رك توتوب، پوللي آروادلارينان ائوله نيبلر... بير تعدادي وكيل اولوب و بيرقه ده ريده گازته باش يازاري... باشين آغريدمييم چوخ سايقيلي و سئويملي آدام لار اولوبلار.
ـ پاردون! مه راق ائتمه م ايچون اوزگونه م... نيچه معاش آليرسينيز؟
جين جوابيندا دئدي:
ـ دوروموموز دگيشيل مه ييب... قانونلار گئچميش قانونلاردي... ائو ائشيميز دولتيندير... آما پارا ويرميرلر، چونكي دولت ايله ايلگي لي مأمور دگيليك. جين اولماقدا بؤيوك بير مقاما صاحب اولماقدير... آما اوست اوسته دوزون ايسته سن، دؤروموز اييي دگيل. اينسان اولماق چوخ ياخشي دير.. آللاه اينسانلارين آتا آناسين باغيشلاسين كي بيزه روشوه ت آلماقي اؤيره تديلر. يوخسا ايندي يئددي كفن چورودموشدوك. ياشايشيميزي اؤزوموز تاپان شيءلريندن باشا آپاريريق... دئمه لي سوچلو بير اينسانا يه مه لي آپاراندا... بيرآزيندا اؤز باردانيميزا توكوروق...
لاخماتف جينّه ايچگي تؤكدو. جيّن ده ايچگي ني ايچيب باشي قيزيشدي، دانيشيقين دادين چيخارديلار. جهنّمين بوتون سيرلارين آچدي و صانديقيندا بير تئل پانبوق قالمادي.
لاخماتوف جين ده ن ائله خوشلاندي كي گئجه اوردا قالماقا ايذن وئردي. جين سوبادا ياتدي و گئجه ني باشاباش سايير بايير دئدي.
شافاقا ياخين، يوخ اولدي.
1ـ كاپول، ژان(1924 ـ1839)